Unseri Gschicht

...mer schryybe s Joor 2022 und zem erschte Mool sit zwai Joor het ändligg wiider e Fasnacht stattgfunde. D Begaischterig isch enorm gsyy – esoo, ass me ändligg wyyder uff dr Strooss und in de Gasse het deerfe schränze. Doch noo isch die groossi Voorfraid wäg de heftige Bandemyy-Beglait-erschyynige driebt woorde. Daas, will näb de finanzielle Noowirggige dr Aint oder Ander no sy Goschdyym und d Larve an Naagel ghängt ghaa het.

Gnabb vor dr Fasnacht 2022 dräffe sich die baide Obmänner vo de Guggemuusige Mohrekopf und Messingkäfer fir e kuurzi Schlisselyybergoob fir s Inschdrumäntedepot an dr Fasnacht. Sie kemme derbyy ins Gsprööch und bläuderle yyber die vergangene Joor. Glaar isch au Corona e Thema gsyy. Dr doodermit erfolgddi Mitgliiderschwund het baide Gugge bersonell stargg zuegsetzt ghaa. Wääred em Gedanggeussdusch zu de aggduelle Uusefoorderige in baide Gsellschafte, maint dr Ainti uffsmool scheerzhaft: «Denn mien miir zwai s ebbe zämme brobiere...»
Was eher blumbb derhäärgsait woorde isch, isch bim Andere aaber uff offeni Oore gstoosse und baidi hän sich dänggt: «Woorum aigendligg nit?» Also hän sich die baide Obmänner noo dr Fasnacht 2022 zemmene gmainsaame Nachtässe droffe, fir zem die Idee kenne z verdieffe.

Dr Räscht isch rasch verzellt. Noodäm d Aggtivmidglyyder vo iirne jeewyylige Verain aagfrogt woorde sin, isch die Zämmenaarbet als Guggepaartnerschaft e beschlosseni Sach gsyy und me het d Blaanig fir die eerscht gmainsaam Fasnacht 2023 in Aagriff gnoo. No vyyl inveschdierter Zyt, sin sich die baide Verain muusikaalisch und organisatoorisch neecher koo. In kurzer Zyt sin derbyy neyi Frindschafte entstande. Me het sich kenne- und schätze gleert.

Noo ere erfolgryyche Fasnacht 2023 isch de Aggitve schnäll glaar woorde, ass me im näggschte Joor wyyder wot gmainsam Fasnacht mache. Daas unter em Motto «zämme!»

Denn, noo zwai gmainsaame Fasnachte, isch baide Verein glaar gsyy, ass us däm no jungfrailigge Brojäggt scho lang mee woorde und ebbis Greessers entstande isch. Soo isch us ere scheerzhafte Idee vonere Fusioon Realidäät und dr Zämmeschluss am 26. Septämber 2024 mit dr Grindigsversammlig vo dr neie Guggemuusig Messingkopf besyyglet woorde.